Тиринь литературань коряс уроконь планось-конспектэсь (8-це класс)

Тиринь литературань коряс уроконь планось-конспектэсь
(8-це класс)

Темась: «Войнань стака шкань невтемась В. Араповонь «Лутазь теште» ёвтнемасонть» (алтави 75 Изнямонь иень топодемантень)

Бажамотне:

1. тонавтомань:

– теемс тонавтницятнень содавиксэкс В. П. Араповонь шкинеманзо марто;

1. домкалгавтомань:

– кастомс эйкакштнэнь логикань мышленияст, памятест, воображенияст, эпикань произведениянть анализэнь теемань ёрокчист, мельстуиця ловнома навыкест;

1. воспитаниянь:

– кастомс тонавтницятнень мелест вечкеме тиринь модаст, масторост ды свал улемс анок сонзэ ванстомо.                                                              

Кедьёнкстнэ: артовкст, портрет, книгань выставка, морот.

Тевс нолдазь методтнэ: репродуктивно-иллюстративной, выразительной ловномань методось, эвристической.

Типесь: комбинированной.

Уроконь планось:

1. Уроконь лувонтень совавтома (1-2 мин)

2. Од материалонь тонавтнема (10-15 мин)

3. Материалонь кемекстамо (20-25 мин)

4. Оймсема шка (4-5 мин)

5. Уроконть коряс цётавксонь теема (2-3 мин)

6. Рефлексия (2-3 мин)

7. Питнень путома (2-3 мин)

8. Кудов тевень максома (1-2 мин)

        Уроконть молемазо:        

1. Уроконь лувонтень совавтома

Эйкакштне:

– Чачома край, чачома край! Косто муят истямо рай?

Тонавтыцясь:

– Шумбрачи, тонавтницят! Арсян тенк валдо мельть-превть ды седейшкава ютавтомс минек уроконть.

1. Од материалонь тонавтнема  

Слайд. Невтевить артовкст: вирь, пакся, сэтьмешка, чилисемась, Брестская крепость. Те фононть коряс ловнови Числав Журавлёвонь  «Верев валске» валморозо.

Удось виресь, паксясь – оймась модась,

Ансяк вирьсэнть покш пря коршось рангсь.

Сон прок содась, течи тэжа ордась

Совась сэтьме масторонок лангс.

Варштась зорясь, теке тапазь чама,

Калесь петнявтсь сельведть эрькенть мештьс.

Мерят, толсто кармась чизэ стямо, –

Се валскестэнть ятнэ Брестэнть шешксть.

Меельцеде тосонь тякат потасть,

Меельцеде рангозь – пижнезь мерсть:

«Авай!»

«Авай!»

… Эшелонтнэ потасть.

Но – «Икелев!» - командиртнэ тердсть.

Весе кирдсть ды лоткавтсть зверень виенть.

Обед ёнов саезь – Пелевес.

Виев кедьсэ сезсть фашистнэнь сивенть, –

Мастор авась толсоль педе – пес.

«Война! Вайна! Ялгат, сырнась война!»  

Ине Отечественной войнась ульнесь эрямонь весе ёнксонь нардевчинь стакадояк стака варчнемакс. Вейкеяк лия войнасо арасель невтезь истямо ялгаксчи, ятонть каршо бороцямосо истямо стакачи ды обуцянь кемечи. Покштояк покш героизма Мордовиянь эрицятне невтсть важодемань фронтсо. Республикань робочейтне ды колхозниктне эзть вансто а виест, а шкаст, ансяк бу изнямс азарсь ятонть. Тиринь масторось  питнейкс ловизе сынст трудост.

Войнань васенце читнестэ ятонть каршо тюреме тусть и мокшэрзянь сёрмадейтнеяк. Эрзянь ды мокшонь цёрат – одт, шумбрат, мазыйть, стихень, прозань вечкицят ды сёрмадыцят – кутмордызь малавиксэст ды тусть. Мельгаст пекставсь кенкшесь, нусмакадсь пертьпельксэсь, чикордозевсть чувттнэ. Сынь тусть. Цёрань тевс. Войнав.

Сынст юткс кандови и Василий Павлович Арапов, минек буень сёрмадеесь, кона истя жо ульнесь Ине Отечественной войнань участникекс. Зярдо ушодовсь Ине войнась, сон служась Тихоокеанской флотсо. Течи седе домкасто ванносынек сонзэ шкинеманзо. Сонзэ эрямокинзэ ёвтнесы Слушкина Алина.

Тонавтницясь ёвтни эрямокинзэ.

Василий Павлович Арапов чачсь 1922-це иень мартонь 10-це чистэ Дубёнка буень Морго велесэ. 1940-це иень сёксня саизь служамо Тихоокеанской флотов.  Сон Ине Отечественной войнань участник. Ульнесь морской пехотинецэкс, воздушной стрелококс, мейле тонавтнесь штурманокс С. А. Леваневский лемсэ Военно-морской авиациянь училищасо. 1947-це иестэ сась кудов. Н. П. Огарёв лемсэ МГУ-нь историянь-филологиянь факультетэнть прядомадо мейле (1959) зярыя иеть ульнесь Дубёнка буень Кенде велень школань директорокс. 1965-це иестэ саезь сась важодеме Кобалень школасо историянь, географиянь, литературань тонавтыцякс.

В. П. Араповонь ёвтнеманзо лиснесть «Сятко», «Мокша», «Чилисема» журналтнэсэ, «Эрзянь правда», «Новая жизнь» газетатнесэ. 1995-це иестэ лиссь «Аштема ков» прозань книгазо.

Тонавтыцясь:

–  Сюкпря паро пачтямонть кисэ.

В. Араповонь ламо произведениянзо алтазь войнань темантень. Ней, эйкакшт, сёрмадсынек течинь чинть ды уроконь теманть: «Войнань стака шкань невтемась В. Араповонь «Лутазь теште» ёвтнемасонть».

Ёвтнеманть мельцек мельцек ловномась.        

1. Од материалонь кемекстамо

1. Башка курова важодема

Тонавтыцясь:

– Парсте ваннынк тенк максозь кевкстематнень-кармавтоматнень ды терявтынк топавтомс.

1-це куронтень кевкстематне-карнмавтоматне:

1. Кодамо кевкстема кепеди сёрмадеесь те произведениясонть?

2. Максодо характеристика следователентень. Вастневить-арасть минек эрямосить истят ломанть?

3. Эсенк валсо ёвтынк ёвтнемань прявт смустензэ. Войнань кодат ёнкст панжозь те ёвтнемасонть?        

2-це куронтень кевкстематне-кармавтоматне:

1. Ёвтнемась прядови Филя атянь эрямосто седеяк покш зыянокс. Кода арсетядо, мекс?

2. Кодамокс невтезь Филя атя?

3. Улить-арасть рузонь литературасо «Лутазь тештенть» ёнов молиця ёвтнемат? Кие сёрмадызе? Кодат сынст башка ёнксост?

1. Исследовательской роботань коряс важодемась

Тонавтыцясь:

– Войнань шкане минек велестэнтькак тукшность фронтов ятонть каршо тюреме ламо ломанть. Сынст ютксо ульнесть и тынк покштянк. Кудов ульнесь максозь теемс а покш исследования тынк покштянк ёвтнемаст коряс.

(2-3 тонавтницят ёвтнить эсест покштядост).

1. Оймсема шка

Тонавтыцясь:

–  Войнанть теманть панжизь эсь шкинемасост аволь ансяк сёрмадейть, но и артыцят. Эйкакшт, ваннык  А. Лавктионовонь «Войнасто сазь сёрма» артовксонть, арсинк ды ёвтынк, кодат мельть-превть рашты те артовксось?

     V. Уроконть коряс цётавксонь тема

Ине Отечественной войнанть прядомадо мейле те иень панжиковсто топодить 75 иеть. Лецявсть стакадояк стака ранатне, строявсть одс тапазь ды пултазь велетне ды оштне, умок уш цветязевсть садтнэ, войнань кшнисэ ацазь ды верьсэ ваозь модатне лексить оля лксемасо ды максыть паро урожай. Но минек масторонь эрицятне зярдояк а стувтсызь ломантнень акулыця подвигест, пингеде пингень сюкпря ёвтыть сетнень, кить максызь эрямост тиринь масторонть олячинзэ кисэ.

Мон арсян, что тынь кастадо паро тевень теицякс ды ультядо тиринь модань вечкицякс ды ванстыцякс.

VI. Рефлексия

VII. Оценкань путома

Тонавтыцясь:

– Эйкакшт, течи тынь уроксо весе парсте важодиде. Путан весенень паро питнеть.

VII. Кудов тевень максома        

Тонавтыцясь:        

– Сы уроксто ютавтано аволь классо ловномань урок. Кудосо ловносынк П. В. Прохоровонь «Цидярдома» ёвтнеманзо. Анокстатадо сонзэ ёвтнеме.

Урокось прядовсь. Вастомазонок!